LAOAG CITY – Natiliw ti maysa a waiter kalpasan a nagpaputok ti homemade caliber 22 iti pagtaengan na iti Brgy. Cabaoran iti ili ti Piddig iti pasado alas dose ti parbangon iti Marso 22, 2020.
Nabigbig ti suspek a ni Hernando Pope John Cardinal y Sauro, agtawen ti 32, baro, freelance waiter ken residente iti Sitio Atibong, iti nasao a barangay.
Basar iti inisyal nga imbestigasyon dagiti otoridad, kadua ni Cardinal a nagiinom, da Antonio Pasion Jr y Ibe, residente iti Brgy Loing, kenni Jocas Lorenzo y Manzanillo, agtawen ti 31 ken residente iti Brgy. Cabaroan iti nasao nga ili.
Rumrumwar a kelaat a nagpaputok ti suspek ti homemade caliber 22 bayat ti panagiinom da iti pagtaengan na.
Nagreport ni Pasion kadagiti kameng ti PNP a nakabantay iti Highway Police Assistance Desk, Poblacion ket dagus a nagresponde da.
Ginandat ti suspek a sumrek iti uneg ti pagtaengan da ngem natiliw met laeng dagiti otoridad.
Kabayatanna, karaman met a mapilaan ti reklamo da Lorenzo kenni Pasion iti panagsalungasing RA 11332 wenno dagiti alagaden iti enhanced community quarantine gapu ta adda da iti saan da a pagtaengan.
Sumango met ni Cardinal iti panagsalungasing iti RA 10591 wenno iligal a panagikot ti paltog kalpasan a narekobre dagiti otoridad ti nasao a klase ti paltog, tallo a kapsula ti caliber 22 ken maysa a bala.
