LAOAG CITY – Naiget a seguridad ti ipapaay ti PNP Laoag kalpasan a natiliw ti pugante a most wanted person iti region 1 ken iti probinsya ti Abra.
Nabigbig ti most wanted person a ni Eugenio Cali Flores, tubo ti Langayan, Abra, maibilang a gun for hire, ken nagindeg iti Brgy Balaoi iti ili a Pagudpud.
Segun ti inisyal nga impormasyon a nakalap ti Bombo Radyo Laoag, maag-agasan ni Flores iti Gov. Roque Ablan Sr. Memorial Hospital ditoy siudad ti Laoag idi matiliw daytoy.
Bayat a maag-agasan ni Flores gapu ti ulcer na iti ospital ket nakailasin ti maysa a kameng ti PNP ken dagus a naipakaammo iti regional office.
Naiserbi ti warrant of arrest kontra iti suspek gapu ti kaso na a 5 counts of murder ken sabsabali pay.
Umabot ti nasurok 12 a tawen a naglemmeng ditoy probinsya ni Flores.
Nupay kasta, inparit ti PNP a makasarita ti Bombo Radyo ti suspek.
