LAOAG CITY – Naisayangkat ti Wreath laying ceremony iti ili ti Sarrat kas paset ti selebrasyon iti maika-109 a kasangay daydi dati Presidente Ferdinand Marcos Sr.
Karaman kadagiti nagatendar ket isuda Police Col. Joemar Labiano, ti Provincial Director iti Ilocos Norte Police Provincial Office, dagiti opisyal iti ili ti Sarrat nga idaulwan ni Mayor Ralph Medrano, dagiti mangisursuro, estudyante ken dagiti opisyal iti gobierno probinsyal.
Ni Sang Panlalawigan Member Saul Lazo ti nadutukan a nangibagi ken nangidanon ti mensahe da Governor Cecilia Araneta-Marcos ken Vice Governor Matthew Marcos-Manotoc.
Iti surat ni Governor Marcos, inpalagip na ti panangibukbok ti dati a presidente ti naunday a panawen iti unos ti panagbiagna iti panagserbi kadagiti Pilipino.
Kuna pay ti gobernador a ditoy Ilocos Norte ket agtalinaed ti dati a presidente a napateg a paset ti pakasaritaan ti probinsya ken identity.
Simmaruno nga inbasa ni Bokal Lazo ti mensahe ni Vice Governor Manotoc, no sadinno a naipalaon iti surat ti panangbigbig na iti lolo na a dati a presidente a nangidaulo iti pagilian ken maipanakkel na unay daytoy.
Innayon na a ti nagbalin a biag ti dati a presidente ket mangipalagip iti napaot nga impact a ti panagserbi iti publiko ket dakkel a tulong aglalo no buyugan ti ambisyon para iti panagdur-as.
Mainaig iti daytoy, iti met panagbitla ni Mayor Medrano, ket binigbig na dagiti naaramidan ti dati a presidente para iti ad-adda a pagsayaatan iti kada Pilipino.
Kuna na nga agpapan ita ket marikrikna paylaeng ti presensya ken ti serbisyo ti dati a presidente babaen kadagiti kameng ti pamilya na nga isuda Presidente Ferdinand Marcos Jr., Senador Imee Marcos, Congessman Sandro Marcos, Congressman Angelo Marcos-Barba, Governor Cecilia Araneta-Marcos ken Vice Governor Matthew Marcos Manotoc.
