LAOAG CITY – Inpakaammo ti World Health Organization (WHO) a mapattapatta a 1.6 milion a tattao ti matay gapu iti pannangan kadagiti ‘unsafe food’ .
Segun ken ni Francesca Branca, mangidadaulo ti nutrition and food safety ti World Health Organization, a nakarkaro ti epekto dagiti saan a natalged a taraon kadagiti ubbing nga awan pay 5 ti tawenda wenno 40% ti dagsen manipud kadagiti saan a natalged a taraon.
Mainaig iti daytoy, dagiti saan a natalged a taraon a naisarang kadagiti mikrobio, neperdi ken narugit a mabalin a pakigapuanan ti impeksion ken sakit a kas iti diarrhea, meningitis ken dadduma pay a sakit a mabalin a mangitunda iti ipapatay.
Malaksid iti daytoy, dagiti agtultuloy a humanitarian crises wenno parikut iti adu a paset ti lubong ti pakaigapuan ti kinaawan ti seguridad ti taraon ken mangikompromiso iti kinatalged ti taraon.
Kabayatanna, indagadag pay ni Branca kadagiti gobierno nga agartamid kadagiti national action plans-da para iti panagisigurado ti kinatalged a taraon ken para iti seguridad ti salun-at ti aglawlaw, animal ken salun-at dagiti tattao.
