LAOAG CITY – Mabalin a ngumato iti 4.8 million a metriko tonelada ti angkaten a bagas ti Pilipinas ita a tawen gapu ta manamnama a bumaba ti produksion ti irik iti kababaan a lebel na iti las-ud ti maysa a dekada gapu iti epekto ti tension iti Middle East ken ti umas-asideg nga El Niño weather phenomenon.
Daytoy ti inbatad ni Department of Agriculture (DA) Assistant Secretary ken spokesperson Arnel de Mesa.
Kuna na a mabalin a bumaba ti rice output ita a tawen iti 18.8 milyon a metriko a tonelada no agtalinaed a nangato ti presio ti abono ken gasolina.
Innayon na a no mapasamak daytoy ket isu ti maibilang a kababaan a produksion ti unhusked rice sipud idi 2016, idi na-log ti output iti 17.6 milyon a metriko tonelada.
Maipalagip nga idi 2025, immabot iti 19.68 milyon a metriko tonelada ti naapit nga irik dagiti mannalon ditoy pagilian no sadinno a sakbay a napasamak ti tension iti Middle East ket ninamnama ti Department of Agriculture a ti produksion ket umabot iti kangatoan a rekord a 20.28 milyon a metriko tonelada.
