LAOAG CITY – Umabot iti 10 a tattao ti natay iti inpabanto nga air strikes ti Israel iti daya ken abagatan a paset ti Lebanon, a nangburak daytoy iti ceasefire deal iti armado a grupo nga Hezbollah idi 2024.
Basar iti state-run media iti Lebanon, innem nga indibidual ti natay iti airstrikes ti Israel iti Bekaa Valley iti abagatan a paset ti pagilian ken adda pay ti 30 a sabsabali dagiti nasugatan.
Agtultuloy ti search operation kadagiti survivor iti natamaan a site.
Segun iti Israeli Army, natamaan da ti command centres ti Hezbollah iti Baalbek area ti Bekaa idinto a kinumpirmaran met ti maysa a source manipod Hezbollah a karaman kadagiti natay iti panagatake ket ti military leader manipod iti armado a grupo.
Immunan a kinumpirmaran ti Ministry of Public Health ti Lebanon a natay ti dua nga indibidwal iti iraraot ti Israel iti Ein el-Hilweh camp, ti kadakkelan a Palestinian refugee camp iti nasao a pagilian.
