LAOAG CITY – Kinumpirmaran ni Police Major Joseph Tayaban, chief of police ti PNP-Badoc nga umabot iti 10 a wanted person ti natiliw da manipud iti nagduduma a barangay iti ili da idi laeng rabii.
Segun kenni Tayaban, dagiti natiliw ket pito a babbai ken tallo a lallaki nga agtawen ti 25 agingga iti 60 nga addaan ti kaso nga iligal a panagsusugal.
Inbatad ni Tayaban a dua kadagiti lallaki a natiliw ket barangay kagawad iti Barangay Balbaldez ken Labut iti nasao nga ili, ken adda pay ti dua a miembro ti 4P’s a residente met iti Barangay Alay.
Inbatad na a dagiti 10 nga indibidual ket natiliw babaen iti warrant of arrest.
Narekomendaran met dagitoy to 30 a ribo a pisos ti tunggal maysa para iti temporaryo a pannakawaya-waya da.
Maipalagip nga iti napalabas nga aldaw ket adda pay ti maysa a wanted person a natiliw dagiti otoridad.
