LAOAG CITY – Naipaayan ti tulong dagiti “livestock growers” manipud iti nagduduma nga ili ditoy probinsia bayat ti pannakaisayangkat ti “Livelihood Assistance to Typhoon Egay Affected Livestock Growers” iti ili a Bacarra.
Inbatad ti Provincial Veterinarian a ni Dr. Loida Valenzuela nga umabot iti 132 a livestock growers ti naipaayan ti baka iti nasao nga aktibidad.
Kuna na a dagiti benepisyaryo ket manipod ditoy ciudad ti Laoag, ili ti Dingras, Bacarra, Badoc, Sarrat, Marcos, Paoay, Banna, San Nicolas, Solsona, Piddig, Pasuquin, Pinili, Vintar ken Nueva Era.
Mainaig iti daytoy, nagyaman ni Governor Matthew Marcos-Manotoc iti Department of Agriculture iti panangidaulo ni Sec. Francisco Tiu-Laurel pakairamanan iti Department of Agriculture-Region 1.
Ginutigot pay ti gobernador ti Provincial Veterinarian nga agkiddaw ti nayun a livestock ken dadduma pay a kasapulan dagiti livestock growers ditoy probinsya.
