LAOAG CITY – Kinompirmaran ni Dr. Rickson Balalio, mangidadaulo iti Provincial Health Office a dua nga indibidual ti pimmusay gapu iti dengue.
Segun kenkuana dagiti pasiente a pimmusay ket agtawen ti 61 a lalaki, residente iti ili ti Dingras ken agtawen ti 4 a babai a residente iti ili ti Bacarra.
Inpettengna a manipud iti bulan ti Enero agingga iti bulan ti Hulio ket adda ti nairekord ti opisinada a 146 nga indibidwal a nagpositibo iti Dengue, nabbaba ti 78.7% iti pakabuklan a bilang dagiti nagpositibo idi 2023 iti kapada a panawen nga umabot iti 685.
Nupay kasta, no idasig iti napalabas a tawen ti 2023 ket awan ti nairekord a pimmusay gapu iti nadakmat a sakit.
Gapu iti daytoy, inrakurakna nga agtultuloy ti iwayat da nga information education campaign iti tunggal munisipyo, panakaimplementar iti 5’s wenno Search and Destroy, Self-protection measures, Seek Consultation, Support fogging in outbreak areas ken iti panagiwaras ti insecticides ken larvicides a makatulong tapnu a malapdan iti panagado ti lamok.
Inkiddaw ni Dr. Balalio iti publiko ti panagtitinnulong dagiti umili nangruna ita a panawen iti panagtutudo nno sadinno rumbeng nga agdalos ti aglawlaw iti inaldaw aldaw.
Innayonna, ita a panawen ti panagtutudo ket umado dagiti mabalin a pagitlugan dagiti lamok no sadinno nagpalagip isuna a ipakleb dagiti mabalina a pagurnongan ti danom.
Kabayatanna, kinunana a no makarikna kadagiti sintomas ti dengue ket insigida nga agturong iti ospital tapno dagos a mataming ti pasiente ken liklikan ti panagtumar wennno panaginom kadagiti nagduduma a banag nga awan ti naan-anay a panagsukisok a mangpaneknek iti kinaepektibo dagitoy.
