LAOAG CITY – Nasken latta a maipaay ti 20% a discount kadagiti Person With Disability (PWD) nupay namin-adu a daras daytoy a gimmatang ti taraon laketdi para iti eksklusibo a konsumo.
Basar iti uppat a panid a legal opinion ti Department of Justice (DOJ), maipakat ti diskuento ken pannakailasin ti Value Added Tax (VAT) iti pakabuklan a gatad ti taraon a ginatang.
Segun iti Department of Justice, nailanad iti Section 6 ti Implementing Rules and Regulations ti “An Act Expanding the Benefits and Privileges of PWDs,” ti benepisio iti panaggatang iti aniaman a goods ken serbisio ket esklusibo para laeng kadagiti adda ti rangkap ti bagina.
Adda pay ti Memorandum Circular ti Department of Tourism a ti 20% a discount ken Value Added Tax exemption ket para laeng kadagiti maseknan a Person With Disability.
Inparuk-at ti Department of Justice ti nasao a legal opinion gapu iti panangkiddaw ni National Council on Disability Affairs (NCDA) Executive Director Glenda Relova.
Nagkiddaw ti National Council on Disability Affairs ti panangilawlawag no sakupen iti nasao a benepisio ti amin a taraon ken mainom a gatgatangen ti Person With Disability iti baet no kasano ti kaadu daytoy.
