LAOAG CITY – Kinumpirmaran ni Dr. Evelyn Tanagon, Bank Officer II ken pannakangiwat ti Bangko Sentral ng Pilipinas (BSP) iti ciudad ti Batac a maiparuk-at intono Disyembre ita a tawen ti baro a disenyo ti five peso coin ken ti baro a maaramid a 20 peso coin.
Segun kenni Tanagon, tapno masolbar ti problema iti pannakaulaw dagiti tattao mainaig iti singko ken piso ket napanunutan ti BSP a mabaliwan ti disenyo ti five peso coin.
Kunana a ti baro a disenyo ti five peso coin ket agkurba iti igid na manipud iti nagbukel, ngem saan da pay nga ammo no mabaliwan met ti kolor na.
Inbatad pay ni Tanagon a napanunutan ti BSP a mapagbalin met a barya ti 20 peso bill gapo ta napapaot a mausar ken daytoy ket naibasar iti survey a naiyuswat iti kallabes.
Mainaig iti daytoy, kuna na nga awan pay ti opisyal a rakurak ti BSP no mano a tawen a mabalin a mausar dagiti daan a five peso coin ken ti 20 peso bill no maiparuk-at ton dagiti baro a kwarta.
Naamoan a ti disenyo ti kwarta ket aramiden ti Numismatic Committee ti BSP ken maisubmitir iti Monetary Board ng aisu ti mangadal a nalaing ken no pumasa ken maisubmitir iti opisina ti presidente ti Pilipinas tapno maaprubaran.
