LAOAG CITY – Inbatad ni Barangay Chairman Melvin Santos iti Barangay 1 ditoy ciudad ti Laoag nga iti pay napalabas a lawas a rinugyan da ti nagsagana para iti panagbisita kadagiti kamposanto iti barangay da a mangrugi ita nga aldaw Oktubre 20.
Inlawlawag na nga adda ti 24 a Barangay Health Emergency Response Teams (BHERTs) nga iwaras na iti lawlaw dagiti kamposanto.
Malaksid iti daytoy, inbilin na metten kadagiti barangay tanud na ti panagronda da kadagiti kamposanto agingga a saan a malpas amin ti schedule a panagbisita kadagiti kamposanto iti barangay da.
Innayon na a manamnama nga addan to pay dagiti opisyal iti dadduma a barangay ditoy ciudad ti Laoag a mapan tumulong kadakuada a kas ti napaspasamak kadagiti napalpalabas a tawen.
Mainaig iti daytoy, nagballaag ti kapitan kadagiti agturong iti kamposanto a saan da nga agitugot kadagiti illegal a banag kas ti patadem ken dadduma pay.
