LAOAG CITY – Naipatungpal ti 24-hour curfew iti estado ti Kano idiay Nigeria gapu iti kumarkaro a tignay protesta kontra iti nangato a presyo dagiti magatgatang ken serbisyo.
Iggem dagiti demonstrador bayat ti panagprotesta da dagiti placard a nakaisuratan a dagitoy ket agpaspasar ti nakaro a bisin.
Ti Estado ti Kanu ket isu ti maikadwa a kadakkelan a ciudad iti nadakamat a pagilian.
Gapu iti kinangina dagiti magatgatang ket ado dagiti residente a makapanunot a mapan agserrek kadagiti nagduduma a pasdek negosyo tapno agala kadagiti naruay a produkto, rason nga adon dagiti establisimiento a nagserra.
Malaksid iti daytoy, gapu iti nakaro a pungtot dagiti tattao ket dinadael da payen ti sumagmamano a sanikua ti gobierno.
Naamoan a gapu ta saan a makontrol dagiti otoridad ti sitwasyon ket nagusar dan ti tear gas, nag-spray da ti napudot a danom ken nagpalto-paltog da tapno mawara dagiti rinibo a demonstrador a nakasugatan ti uppat nga indibidual.
