LAOAG CITY – Umabot iti 25 a merchants wenno babassit a negosyante ti manamnama a makipaset iti Merkato ni Nanay Ces iti Valentine’s edition intono Pebrero 13-14, 2026.
Maiwayat daytoy iti sango ti kapitolyo probinsyal, partikular iti pakaipatpatungpalan ti Kadiwa nga Pangulo.
Inpakaammo ni Governor Cecilia Araneta-Marcos a dagiti kangrunaan a magatang iti daytoy ket dagiti nagduduma a produkto a napintas ken mabalin a pagregalo iti kaaldawan dagiti puso.
Karaman ditoy dagiti cakes, pastries, sabsabong, dagiti nagansilyo a nagduduma a banag ken dadduma pay a produkto a napintas a pagregalo iti selebrasyon ti Valentine’s Day.
Kabayatanna, addan to pay ti maikabil a booth a pagyanan dagiti nagduduma a lokal a gobierno a ti kangrunaan nga idiaya da ket dagiti produkto a naaramid babaen kadagiti basura.
Mangnamnama ti gobernador nga agserbi daytoy nga inspirasyon para kadagiti umili tapno sursurwen da met ti agaramid kadagiti produkto babaen ti basura tapno adda ti nayun a pamastrekan da.
