(UPDATE) LAOAG CITY – Nagpatpatnag a binantayan dagiti kameng iti BFP, PNP, empleado iti munisipyo ken opisyal ti barangay iti Caroan Elementary School iti Barangay Caraon, Pasuquin, Ilocos Norte.
Ti nasao a pagadalan ti nagserbi nga evacuation center para kadagiti 26 a pamilya wenno 124 nga indibidual a naibakwit kalpasan nga agpangpangta a lamuten ti danum ti baybay ti agarup 26 a balay iti Bgy. Caruan iti ili a Pasuquin.
Inbatad ni Senior Fire Officer (SFO2) Howell Cuepo, firemarashall iti Bureau of Fire Protection (BFP) iti nasao nga ili, naiget ti panagbantay da kadagiti evacuees kangrunaan na ket adda dagiti masikog, nataengan ken ubbing.
Kabayatanna, inbatad ni Mrs. Rosemarie Daludado, maysa kadagiti naibakwit a nagbakwit da amin a sangapamilya gapu ti panagamak da gapu ta asideg da a mismo iti nadadael a sea wall ken nadawel ti baybay gubuay ti habagat.
Innayon na a no mariprap ti sea wall ket agsubli danto met laeng iti balay da gapu ta awan ti sabali a papanan da.
