LAOAG CITY – Sinukon dagiti kabagian dagiti lima nga agtutubo a nakita nga agtaltalinaed iti sirok ti Gilbert Bridge ditoy siudad ti Laoag.
Daytoy ti naammoan ti Bombo Radyo Laoag apaman ti panagturong ti News Team iti Philippine National Police ditoy siudad ti Laoag.
Basar iti pannakisarsarita ti News Team ti Bombo Radyo Laoag iti kabagian ti maysa kadagiti agtutubo nga agtawen ti 14, gapu ta naisublin kadagiti kabagian dagiti maseknan nga agtutubo ket saanen a maikabil iti sidong ti City Social Welfare and Development Office dagitoy.
Nupay kasta, inbatadna a kalikagumna a maipan pay laeng koma dagiti agtutubo iti sidong ti Bahay Pag-asa tapno agbalbaliw ken mabantayan iti panagdakkelda imbes nga adda dagitoy iti langlangalang a mabalin pay a mangitunda ti desgrasia kadakuada.
Inlawlawagna a masansan a tumaltalaw dagiti nasao nga agtutubo nga agturong kadagiti nagduduma a lugar ditoy siudad ti Laoag.
Kunana a saanna a mabayabayan dagitoy gapu ta adda met ti annakna a masapolna a bantayan ken asikasoen iti inaldaw-aldaw.
Mainaig iti daytoy, inpasingked ti Women and Children’s Protection Desk ti Philippine National Police ditoy siudad ti Laoag nga addan iti nasayaat ken natalged a kasasaad dagiti lima nga agtutubo ken inpanamnamada a maipaay kadakuada ti naan-anay a seguridad ken maiyadayo iti peggad dagitoy.
Immuna iti daytoy, adda ti naawat ti Bombo Radyo Laoag nga adda ti dua a babbai ken tallo a lallaki nga agtutubo ti agtaltalinaed iti sirok ti rangtay ti Gilbert Bridge ditoy siudad ti Laoag rason nga indanon ti News Team daytoy a banag kadagiti barangay officials ti Barangay 51-A Nangalisan ditoy siudad banag a dagus met daytoy a natratar.
