LAOAG CITY -Umabot iti innem a tattao ti natay idinto a 10 a sabsabali a dagiti nasugatan iti napasamak a layos ken landslides iti sumagmamano a paset ti Ishikawa prefecture idiay Japan.
Naamoan a manarimaan paylaeng ti panagrekobre ti ciudad ti Wajima ken Suzu manipod iti napigsa a gingined idi Enero ita a tawen, ngem karaman manen dagitoy as lugar kadagiti naapektaran ti kalamidad.
Basar iti report, napasamak ti layos ken panagreggaay ti daga kalpasan ti sumagmamano nga aldaw a panagtudtudo na ti napigsa.
Dua kadagiti pimmusay ket nabirukan ti bangkay da iti asideg ti nakapasamakan ti landslide a timmama iti tunnel iti Wajima no sadinno maysa kadagitoy ket construction worker.
Karaman pay kadagiti pimmusay ket dua a lakay ken dua a baket.
Mainaig iti daytoy, inpakaammo ti Hokuriku Electric Power Company nga umabot iti agarop 4 a ribo a residente manipod iti uppat a ciudad idiay Japan a pakairamanan pay ti Niigata and Yamagata ti napukawan ti suplay ti kuryente na.
