LAOAG CITY – Inrakurak ni President Ferdinand “Bongbong” Marcos Jr. a ti P60-billion nga excess funds ti Philippines Health Insurance Corp. (PhilHealth), a naiyakar iti national treasury ket maisubli iti state health insurer.
Inbatad daytoy ni Marcos kabayatan ti ibibisita na iti Dr. Jose Fabella Memorial Hospital in Sta. Cruz, Manila.
Segun kenni Marcos, naragsak gapo ta addaan ti urnong a kaadoan ket manipud iti Department of Public Works and Highways (DPWH) isut gapo na a maisubli ti pondo iti PhilHealth.
Inlawlawag na a ti 60 bilyon a pisos a nausar idi kadagiti nagduduma a proyekto ti gobierno ngem ita ket addan ti urnong.
Maipalagip nga idi napalabas a tawen, inbilin ti Department of Finance (DOF) ti pannakaiyakar ti excess funds ti PhilHealth nga agbalor ti P89.9 billion iti Treasury, a daytoy ket subsidiya ti gobierno saan a maipud iti kontribusyon dagiti gobierno.
Iti nadakamat a kantidad, 60 bilyon a pisos ket naiyakaren iti treasury ken P29.9 billion ti nabati iti PhilHealth sakbay pay a nangisyu ti Kore Suprema ti temporary restraining order iti fund transfer kalpasan met ti petisyon ni Senator Koko Pimentel, Philippine Medical Association ken dadduma pay.
Idi laeng met napalabas nga Abril, inbatad ni Finance Secretary Ralph Recto iti Supreme Court a ti P60 billion ket nabingay no sadinno naipan ti P27.45 billion kas bayad iti allowances kadagiti COVID-19 frontliners; P10 billion para iti Social Programs for Health para iti panangipaay ti medical assistance kadagiti marigrigat a Pilipino; P3.37 billion iti pannakaestablisar ti tallo a DOH facilitiesl P4.1 billion iti pannakapapintas kadagiti pasilidad ti Department of Health; P1.6 billion met ket naipan iti Health Facilities Enhancement Program ken ti P13 billion ket pondo iti government counterpart para iti foreign-assisted infrastructure ken social determinants iti health projects.
