LAOAG CITY – Naipasa iti maikadua ken maudi a pannakaibasana ti Draft Provincial Resolution No. 2024-04-279 wenno ti resolusion a mangaprobar ti Petition for Accreditation ti Parola Santuwaryo Incorporated.
Daytoy ket kagiddan ti pannakaisayangkat ti regular session iti Sangguniang Panlalawigan.
Segun ken ni Ms. Cristy Agustin, ti Program Manager iti nasao nga organisasion, daytoy ket maysa a non-profit, non-political ken non-religious organization a masarakan iti Brgy. Calayab ditoy siudad ti Laoag.
Inbatadna a ti nasao a grupo ket mangipapaay ti natalged a pagnaedan dagiti ubbing nga agtawen ti 18 ken agpababa a nagbalin a biktima ti sexual abuse.
Inlawlawagna a babaen iti nasao a grupo ket maipaayan dagitoy ti libre a programa ken aktibidad a makatulong tapno makarekobreda manipod kadagiti panangabuso.
Iti agdama, kunana nga adda ti 11 nga ubbing nga adda iti sidongda ken amin dagitoy ket inyendorso ti Department of Social Welfare and Development manipod iti nagduduma nga ili ken siudad ditoy probinsia.
Mainaig iti daytoy, inpakaammona a manipod idi 2018 ket inrubuatda daytoy a serbisio gapu iti agtultuloy a kaso ti panangabuso kadagiti indibidual ti pagilian nangruna kadagiti babbai ken ubbing.
Inpalgakna a ti nakaladladingit ket dagiti mismo pay kameng ti pamiliada ti mangar-aramid ti panangabuso kadagiti biktima.
Innayonna nga iti baet a libre dagiti ipapapayda a serbisio ket punpundoan daytoy ti Lighthouse Sanctuary ken agkiddawda kadagiti Local Government Unit tapno adda ti mausar a makatulong kadagiti adda iti sidongda.
Kabayatanna, naipasa ti maikadua ken maudi a pannakaibasana ti nasao a resulosion babaen iti 13 a butos.
