LAOAG CITY – Nadismaya ni Barangay Kagawad Gilbert Abad iti Barangay Margaay, Vintar, Ilocos Norte gapu ta lima a ribo a pisos laeng ti naited kadakuada a bonus ita a paskua imbes a 8 ribo a pisos.
Inbatad na a ti palawag kadakuada ni Barangay Chairman Jun Cadavona iti met laeng nadakamat a barangay, inikkatan na ti bonus da gapu ta pinagbayad na ti bill da iti kuryente.
Segun ken ni Abad, ti paggaammo na ket nasurok a 10 ribo a pisos ti bayadan da iti kuryente.
Inlawlawag na nga amin da a pito a barangay kagawad ket sag-lilima ribo a pisos laeng ti naawat da a bonus.
Inpetteng ni Abad a sakbay koma a kinissayan ti kapitan ti bonus da ket nakisarita pay laeng nga immuna kadakuada.
Kabayatanna, inbatad ni Abad a saan da pay a naawat ti honorarium da sipud idi oktubre agingga ita a bolan ti disyembre.
Kuna na a ti patien na a makaigapu no apay awan pay ti honorarium da ket ti panagresign ti treasurer da ken napenpending dagiti dokumento da.
