LAOAG CITY – Binallaagan ti Philippine National Police (PNP) dagiti negosyante a manggungundaway ti mapaspasaran a krisis iti langis iti pagilian, kagiddan ti panangkumpirmar a ginasut a gas stations paylaeng ti saan nga agop-operar gapu iti panagkurkurang iti supply.
Basar iti report ti nailian a pulisya, naiget ti panagbanbantay da iti presyo ken distribusyon ti petrolyo.
Daytoy ket kalpasan a nakairekord kadagiti kaso ti pananggundaway idinto nga agtultuloy ti mapaspasaran a krisis ti pagilian gapu iti epekto ti riribok iti Middle East no sadinno nga addan ti siyam a kaso nga inpila ti PNP.
Tapno masigurado nga adda ti natalged a supply, makikokoordinar ni PNP Chief Gen. Jose Melencio Nartatez Jr. iti Department of Energy (DOE) ken kadagiti Municipal Price Coordinating Council.
Agtalinaed met iti full alert status ti nailian a pulisya no sadinno a nasuroka a 98,000 personnel ti nakadeploy sipud pay idi Marso 31.
