LAOAG CITY – Kalikagum ti Sangguniang Panlungsod ditoy siudad ti Laoag a mausar ti thermo plastic iti amin a pedestrian lane ken nayon a solar road stud lights kadagiti kalsada.
Daytoy ti indasar ni Sangguniang Panlungsod Member Bryan Alcid, ti Chairman iti Committee on Transportation kabayatan ti naisayangkat a regular session.
Segun kenkuana, immunan nga adda ti nagkiddaw a maikkan ti pedestrian lane iti City Environment and Natural Resources Office a masarakan iti Brgy. Barit ditoy siudad tapno adda ti pakalasinan nga adda ti ahensia wenno departamento iti lugar kas dagiti pagadalan.
Gapu iti daytoy, kunana a gagem ti konseho a mangputar ti resolusion maipapan iti nasao a banag no sadino matratar daytoy inton sumaruno a regular session ti konseho.
Innayonna a babaen iti daytoy, maadal ken matingiting a naimbag ti mailunglungalong a gakat a pakabenipisiaran dagiti umili nangruna para kadagiti motorista.
