LAOAG CITY – Nangipakita ti napigsa a suporta ni Senador Christopher “Bong” Go iti pannakaipatungpal ti graphic health warnings kadagiti electronic cigarette, maysa a gakat a naituding inton Mayo 12 kas ti inrakurak ti Department of Health.
Inpaganetget ni Go ti kasapulan dagiti kapada nga addang kadagiti produkto a tabako a maiyallubog iti Republic Act No. 10643 wenno ti Graphics Health Warnings Law; kasta pay ti Republic Act No. 11900, wenno ti Vaporized Nicotine and Non-Nicotine Products Regulation Act ken Republic Act No. 11346 a mangamendar iti National Internal Revenue Code a maipangato ti excise tax kadagiti produkto a tabako ken mangipataw ti excise tax kadagiti heated tobacco products ken electronic cigarette.
Daytoy a ballaag ket tapno maipakaammo kadagiti gumatang ti peggad ti nicotine ken non-nicotine vape products.
Basar iti Section 4A ti Republic Act No. 11900, ti vape packaging ket nasken nga adda ti karaman nga “highly visible, full-color graphic health warning” a sumakop iti 50 a porsiento ti front ken back panels.
Dagitoy a pakdaar ket nasken a sumurot kadagiti intuding ti Department of Health iti babaen ti Republic Act No. 10643 wenno am-ammo pay iti awag a Graphic Health Warnings Law. Ti Department of Health ket responsable para iti panangbukel ti pagalagadan ken template para kadagiti Graphic Health Warning.
Naammoan a dagiti aglabsing iti baro a pagannurutan ket sumango iti nadagsen a pannusa pakairamanan ti pannakaibalud ken multa ti agingga 5 a milyon pisos pakairamanan ti potensyal a panangikkat iti business permit ken lisensia.
Inpetteng ni Go a napateg dagiti nasao a pagannurutan iti panangipaay ti prayoridad iti salun-at kadagiti Pilipino a gumatgatang nagruna para kadagiti agtutubo.
