LAOAG CITY – Plano a paigetan ti Senado ni dati a Philippine Drug Enforcement Agency Agent Jonathan Morales iti sumaruno a panagdegngeg tapno maammoan no asino ti adda iti likudan ti rebelasion maipapan iti “PDEA leaks” a pakairamramanan ni Presidente Ferdinand Marcos Jr. ken dadduma pay a celebrity iti panagusar ti iligal a droga.
Binabalaw ni Sen. Ronald “Bato” Dela Rosa, ti Chairman ti Senate Committee on Public Order and Illegal Drugs dagiti sumagmamano a kongresista gapu iti agtultuloy a panagdengngeg ti komitena iti “PDEA Leaks” iti baet nga awan met ti naidasar a nadadagsen nga ebidensia ken mapagdudduduaan dagiti sumagmamano a simmango a personalidad.
Inpasigurado ni Dela Rosa a saanda a laplappedan ti kinapudno ken pagsarsaritaenda dagiti resource persons a sumangsango iti komite.
Maipalagip a kwinestionaran ni Sen. Jinggoy Estrada ti kredibilidad ni Morales a naminduan a daras a naikkat iti police force ken na-dismissed ken kinasoan ti Korte gapu iti panagbalinna nga incompetent wenno saanna a kabaelan ti trabahona iti Philippine Drug Enforcement Agency.
Iti desision ti Civil Service Commission idi Hulio 7, 2014, kinanununganna ti desision ti Philippine Drug Enforcement Agency a mangpadisi ken ni Morales gapu iti saan a panangibaga ti pudno ken grave misconduct iti panagimula ti ebidensia iti maysa a drug-bust operation. Napawilan pay ni Morales a mangala ti aniaman a civil service exam ken forfeited ti retirement benefits-na.
