LAOAG CITY – Naragsak nga inpakaammo ni Mrs. Vilma Ranchez, ti mangidadaulo iti Community Affairs Office ditoy siudad ti Laoag a dumanon iti nasurok-kumurang nga 400 ti bakante a trabaho ti maidiaya para iti umas-asideg a panaglukat ti SM ditoy siudad.
Segun kenkuana, nakikoordinar dagiti nangangato nga opisial ti nasao a dakkel a mall ken ni Mayor Michael Marcos Keon maipanggep iti nasao a banag.
Inbatadna a maysa kadagiti kangrunaan a maidiaya a posision ket ti Mall Manager ken agpababa no sadino mabalinda a bisitaen ti official online page ti Public Employmer Service Office ditoy siudad ti Laoag para iti ad-adu pay a detalye.
Inlawlawagna a mangrugin a mangiyuswat ti interbyu dagiti pannakabagi ti nadakamat a dakkel a mall inton Hunio 6 ita a tawen.
Mainaig iti daytoy, kunana a ti nasao nga aktibidad ket kas paset ti pannakaselebrar ti Charter Day iti lokal a gobierno ditoy siudad ti Laoag.
Innayonna a daytoy a banag ket naipakaammo metten kadagiti maseknan a barangay captain ditoy siudad tapno ad-adda a maipakaammo kadagiti kabarangayanda nga agbirbiruk ti trabaho.
Immuna iti daytoy, inpasingked ni Mayor Keon a mangrugi nga agoperar ti SM Laoag inton Disiembre ita a tawen.
