LAOAG CITY – Inpakaammo ni Dr. Alan Taylan, ti St. Camillus De Lellis Hospital ditoy siudad ti Laoag a mabalin a makaala ti sakit a kanser ti panagluto iti gas stove.
Segun kenkuana, daytoy ket kalpasan a makalang-ab ti makunkuna a noxious gas a makaapektar iti salun-at ti maysa nga indibidual.
Inbatadna a ti noxious gas ket isu ti mangigubuay ti carbon dioxide nga adda dagiti kemikal daytoy a makaapektar iti salun-at ti maysa a tao.
Kunana a narisgo pay iti salun-at ti panag-welding ken panagtuntuno gapu ta maapektaran ti bara ken puso gapu iti asok daytoy.
Inlawlawagna a nasaysayaat no agisuot ti face mask tapno saan a direkta a maangot ti noxious gas ken maliklikan ti peggad iti salun-at.
Mainaig iti daytoy, kuna ni Dr. Taylan nga al-alisto a maapektaran dagiti natataengan ken ubbing gapu ta nakapkapsot ti resistensiya dagitoy.
Innayonna a dakkel ti epektona iti salun-at ti maysa a tao apaman a malang-ab ti noxious gas isu a masapol ti doble a panagan-annad.
Immuna iti daytoy, maibasar iti panagadal ti Stanford Doerr School of Sustainability ket adda ti epekto daytoy iti salun-at gapu iti lebel ti nitrogen dioxide iti pagtaengan nga agus-usar ti gas wenno propane a kalan.
