LAOAG CITY – Agtultuloy nga im-imbestigaran dagiti otoridad ti rason iti panagsuek ti Cessna 208B Grand Caravan a nagsuek idi Huebes, Pebrero 6 idiay Alaska.
Simmangpet idi Sabado ti siam nga imbestigador ti National Transportation Safety Board (NTSB) tapno rugianen ti imbestigasion iti plane crash site ti nasao nga eroplano.
Segun ken ni National Transportation Safety Board Chair Jennifer Homendy, ti aircraft ket adda ti siam a nakalugan a pasahero idi a kellaat a napukawan ti radar contact ti piloto daytoy nga agarup 3:30pm lokal nga oras iti Nome, Alaska kabayatan nga agturturong daytoy iti Unalakleet, Alaska.
Nakita ti United States Coast Guard dagiti debris ti nag-crash nga aircraft idi Biernes iti maysa nga ice floe iti kaadayo a 34 a milya manipud iti baybay.
Inbatad ni Homendy, agtultuloy ti iwaywayatda a recovery efforts nangruna kadagiti bangkay ti siam a pasahero ken ti piloto ti aircraft iti nasao a plane crash.
Kabayatanna, inpasingked ni Homendy iti pamilia dagiti pimmusay ken iti publiko, aramiden ti team-da ti amin a kabaelanda tapno maammoan ti namunganayan iti likud ti panagsuek ti Cessna 208B.
