LAOAG CITY – Makumikum dagiti otoridad iti iwaywayat da a search ken rescue operation para kadagiti walo a construction workers a napupuk iti uneg ti tunnel iti uneg ti nasurok a 72 nga oras iti estado ti Telangana idiay India.
Basar iti report, umabot iti 50 a construction workers ti adda iti uneg ti 26.7-mile ti kaatiddog na a tunnel a masarakan iti Nagarkurnool district idi nagreggaay ti daga.
Inbatad dagiti otoridad nga 43 kadagiti construction workers ket kinabaelan da iti rimuar iti uneg ti tunnel idinto a dagiti walo ket napupuk gapu iti kinalubo ken agtultuloy a paggidday dagiti daga.
Marigatan payen dagiti otoridad a mangestablisar ti mabalin da a pangkontakan kadagiti napupuk a trabahador tapno koma maipaayan dagitoy ti oxygen ken dadduma nga essential supplies.
Gapu iti daytoy, agamak dagiti otoridad iti posibilidad a bassit laengen ti tiyansa na a maiyaon da dagiti nasao a construction worker a sibibiag pay no saanda paylaeng a mairuwar dagitoy iti kabiitan a panawen.
