LAOAG CITY – Dumanon iti 26 a fire incidents ti nairekord ditoy probinsia.
Segun ken ni F/Supt. Roxanne Parado, Provincial Fire Marshal ti Bureau of Fire Protection ditoy probinsia, daytoy ket manipud idi Enero 1 agingga ita nga aldaw, Pebrero 27 iti agdama a tawen.
Inbatadna a kadagupan iti nasao a bilang ket walo ditoy ket residential, 12 a non-structural, tallo a vehicular fire pakairamanan ti grass fire, forest fire ken accidental fire.
Inlawlawagna nga adda pay ti pito a manarimaan pay laeng iti pannakaiwayat ti imbestigasionna.
Kunana a ngumatngato ti mapaspasamak nga uram nangruna ket dandanin a sumrek ti panawen ti kalgaw kageddan ti pannakaselebrar ti Fire Prevention Month inton bulan ti Marso.
Gapu iti daytoy, kiniddaw ni F/Supt. Parado ti naan-annay a pannakikooperar dagiti umili tapno maliklikan ti uram.
Immuna iti daytoy, agarup maysa nga ektaria ti naapektaran iti napasamak a grass fire iti paset ti Barangay 16 ditoy siudad ti Laoag iti kallabes.
