LAOAG CITY – Binallaagan ti Department of Agriculture dagiti reseller ti National Food Authority wenno NFA rice a mangpanayon iti agdama a presio daytoy.
Inbatad ni Agriculture Secretary Francisco Tiu Laurel Jr., sumango iti maiyannatop a pannusa ti asinoman a mapaneknekan a manggungundaway iti presio ti NFA rice.
Inaramid ti sekretario ti ballaag kageddan ti panangrugi ti panaglako ti nalaka a bagas wenno NFA rice iti siudad ti San Juan idiay Metro Manila.
Inlawlawagna a saanda a palubosan dagiti negosiante a tubuan daytoy ti dakkel ngem palubosan ti ahensia dagitoy a gumatang ti kaban nga NFA rice.
Kunana a mabalin laeng nga ilako ti NFA rice iti balor a P33 ken P35 iti kada kilo.
Kabayatanna, naipaima kadagiti lokal a gobierno ti desision no ania ti agbalin a diskarteda iti panaglako ti nasao a bagas.
