LAOAG CITY – Maysa a naidumduma a panagadal idiay Japan ti naduktalan no sadinno nga arig domino effect ti panagisbo dagiti chimpanzee no adda ti maysa nga umisbo ket sumaruno dagiti dadduma.
Basar iti Kyoto University, inadalda ti nasao nga ugali iti uneg ti 600 nga oras a panangobserbar iti maysa a grupo ti chimpanzees iti Kumamoto Prefecture.
Nariparda nga al-alisto a tuladen dagiti nababa a ranggo iti grupo ti panagisbo ngem iti nangatngato kadakuada a mangipakpakita ti impluwensia ti social hierarchy iti garaw ti ayop.
Iti naiwayat nga eksperimento, nairekord ti 1,328 a daras ti panagisbo iti uneg ti uppat a grupo ti chimpanzees.
Rimmuar iti panagsukisok, nalablabes iti doble ti posibilidad nga aggegeddan ti panagisbo ti dua wenno nasursurok pay a chimpanzee maidasig no random laeng daytoy a mapaspasamak.
Saan daytoy ti umuna a daras a naammoan a makaakar ti sumagmamano a garaw iti ayup.
Naammoan pay ti panaggegeddan a panagsuyaab ken kellaat a panagtaray dagiti ayup iti maysa a grupo kas paset ti social behavior dagitoy.
