LAOAG CITY – Inpakaammo ni Bombo International News Correspondent Rene Ballenas manipud idiay Estados Unidos nga awan ti nasugatan iti panag-emergency landing ti FedEx cargo plane iti eropuerto idiay New Jersey, United States of America.
Daytoy ket kalpasan nga adda ti nadungpar ti eroplano a tumatayab a nangitunda ti pannakadadael ti maysa kadagiti makina ti eroplano.
Segun ken ni Ballenas, ti nasao nga eroplano ket manipud iti Newark Liberty International Airport nga agturong iti Indianapolis kas maibasar iti Federal Aviation Administration.
Inbatadna a gapu iti daytoy ket naitantan ti agarup 15 agingga 20 a minuto dagiti amin a flights iti nadakamat nga eropuerto tapno maliklikan ti saan a napintas a mapasamak.
Inlawlawagna a dagiti seagulls a tumaytayab a makadanon iti eroplano ket dadakkel ken no bilang mapanda iti makina ti eroplano ket sigurado nga adda ti tumaod a problema.
Innayonna nga addan ti sumurok 100 a bird strike iti eroplano ti napasamak iti uneg ti 20 a tawen idiay New Jersey ngem kaaduan kadagitoy ket nagtultuloy ti biaheda nga awan ti aniaman nga aberya iti tangatang.
Kabayatanna, naammoan a daytoy met ti maikadua a gundaway nga adda ti nadungpar ti eroplano a tumatayab a nangitunda ti panag-emergency landing.
