LAOAG CITY – Sumurok 76% a balota nga usaren para iti May 12, 2025 National and Local Elections (NLE) ti nalpasen a naimprenta ti Commission on Elections (Comelec).
Iti datos nga inburay ni Commission on Elections Chairman George Erwin Garcia iti media, agingga idi Marso 3, 2025 ti bigat ket dumanonen iti 53,894,129 a balota ti nalpasdan.
Daytoy ket 76.58% ti pakabuklan a 72 a milyon a ballot requirement para iti midterm polls.
Malaksid iti daytoy, adda ti 16,338,956 a balota laengen ti kasapulan a maimprinta ti Commission on Elections para iti eleksion.
Kumpiansa ti Commission on Elections a malpasda ti ballot printing agingga inton Marso 19.
