LAOAG CITY – Manamnama a sumangpet inton rabii wenno inton bigat dagiti bangkay ti dua a piloto ti Philippine Air Force (PAF) kalpasan a nagsuek ti naglugananda nga FA-50 fighter jet idiay Bukidnon idi Martes ti parbangon.
Iti media advisory ti Philippine Air Force, agdiretso iti Villamor Air Base, Pasay City dagiti bangkay ti dua a piloto no sadinno a naikeddeng a maipaayan dagitoy ti pammigbig.
Inkari ti liderato ti Philippine Air Force ti agtultuloy a suporta kadagiti napanawan a pamilia dagiti dua a piloto.
Immunan nga inrakurak ni Philippine Air Force Spokesperson Col. Ma. Consuelo Castillo a manamnama a maduktalanen iti mabiit ti rason iti panagsuek ti FA-50 fighter jet gapu ta nabirukanen ti flight data recorder daytoy.
Kabayatanna, addan iti crash site dagiti imbestigador ti Philippine Air Force tapno imbestigaren ti insidente idinto a naiget a banbantayan dagiti kameng ti Philippine Army iti aglawlaw ti Mt. Kalatungan, Barangay Mirayon, Talakag Bukidnon.
