LAOAG CITY – Nangrugin a nagsursur ti Ilocos Norte Electric Cooperative wenno INEC kadagiti pagadalan a mausar para iti 2025 Palarong Pambansa.
Daytoy ti maysa kadagiti addang nga ar-aramiden ti nasao a kooperatiba kas pannakikoordinar ti naindaklan nga sports event a maangay ditoy probinsia inton Mayo.
Segun ken ni Mr. Cipriano Perry Martinez, Acting General Manager ti Ilocos Norte Electric Cooperative a naruay dagiti pagadalan a nangipatulod ti surat kenkuana a nagkiddaw dagitoy ti tulong wenno iti panakaipasigurado ti koneksion kabayatan ti event.
Inbatadna sidadaan dagitoy a tumulong nangruna kadagiti billeting areas tapno awan ti aniaman a problema mainaig iti kuriente a mausar.
Inlawlawagna nga addan dagiti napabuludanda ti transformer ken babaen ti panagsursurda ket plastarenda dagiti kasapulan a maplastar.
Inpasigurado pay ni Martinez a saan nga agbalin nga isyu ti kuriente inton Palarong Pambansa.
