LAOAG CITY – Maysa a negosiante idiay Indonesia ti nangbalbaliw ti naabandonar nga eroplano a nagbalin a luxury two-bedroom villa.
Nabiit pay a napagsasaritaan iti online ti Russian entrepreneur a ni Felix Demin gapu iti karkarna a pagtaenganna a dati a Boeing 737 nga eroplano.
Iti house tour video nga in-post ni Demin, makita ti luxury villa-na nga addaan iti dua a kuarto, infinity pool nga addaan iti buya ti Indian Ocean ken nalawa a terrace.
Malaksid iti dua a kuarto, addaan pay iti salas, sofa bed ken glass portal. Napagbalinen ti dati a cockpit a banio nga addaan kadagiti walk-in closet.
Masarakan daytoy a balay iti tuktok ti Nyang Nyang Cliffs idiay Bali, Indonesia.
Iti maysa nga interbiu ken ni Demin, nagatangna ti Boeing 737 manipud iti saanen a maus-usar a Mandala Airlines idi 2021.
Daytoy ket nalpas a nabaliwan kas maysa a pribado a villa idi 2023. Paab-abangan ti villa para kadagiti short term stay.
