LAOAG CITY – Gimminad ti inflation rate ditoy Pilipinas idi Pebrero iti agdama a tawen.
Segun ken ni Philippine Statistics Authority Deputy National Statistician Sectoral Statistics Office ASec. Divina Gracia Del Prado a gimminad ti 2.1% ti inflation wenno kinapaspas ti panagngato ti presio dagiti magatgatang ken serbisio iti pagilian maidasig iti nairekord a 2.9% idi Enero 2025.
Inbatad ti opisial a kangrunaan a nakatulong iti naginad nga inflation iti napalabas a bulan ket ad-adda a naginad nga inflation iti food, alcoholic beverages ken transportation.
Iti food inflation, bimmaba daytoy ti 2.6% idi Pebrero no sadinno ti kangrunaan a nakatulong ti panagbaba ti presio kadagiti nateng, tubers, cereals ken cereal products kangrunaanna ti bagas.
Maipapan iti inflation iti housing, water, electricity ken dadduma pay a fuels, nakatulong daytoy ti panagbaba iti inflation a 16.7% idinto nga iti transportation, nakatulong iti panagbaba ti inflation ti panagbaba ti presio ti gasolina ken diesel.
Naammoan a ti inflation iti napalabas a bulan ket nababbaba maidasig iti mapattapatta ti Bangko Sentral ng Pilipinas nga adda iti nagbaetan ti 2.2% agingga iti 3% inflation para bulan ti Pebrero.
