LAOAG CITY – Inbatad ni Foreign Affairs Secretary Enrique Manalo nga awan pay ti direktiba nga inparuk-at ti Embahada ti Pilipinas iti The Hague mainaig iti pannakaarestar ni dati a Presidente Rodrigo Duterte para iti crimes against humanity.
Inlawlawag ni Manalo a ti Department of Interior and Local Government (DILG), Philippine National Police (PNP), ken Department of Justice (DOJ) ti mangiwanwanwan iti daytoy nga isyu.
Innayon na nga awanen ti koordinasyon ti Department of Foreign Affairs iti International Criminal Court (ICC) sipud nagikkat ti Pilipinas iti Rome Statute idi 2019 iti babaen ti administrasyon ni Duterte.
Immunan a naarestar ni Duterte iti Ninoy Aquino International Airport apaman a simmangpet iti Pilipinas manipod idiay Hong Kong ken naikabil iti Villamor Airbase para iti pannakaeksamen ti salun-at na.
Sakupen ti imbestigasyon ti International Criminal Court dagiti maipagarop a krimen nga adda ti pakainaigan iti kampanya kontra iti illegal a droga ni Duterte sipud idi Nobyembre 2011 agingga iti Marso 2019, sakbay nga opisyal a nagikkat ti Pilipinas iti International Criminal Court.
