LAOAG CITY – Natay ti dua a construction worker kalpasan a nagaburanda kabayatan ti maar-aramid a drainage canal iti likud a paset ti Plaza del Norte and Convention Center a sakupen iti Barangay Balacad ditoy siudad ti Laoag.
Segun ken ni Dr. Melvin Manuel, mangidadaulo ti City Disaster Risk Reduction and Management Office, adda ti tallo a construction worker ti nagaburan kabayatan ti maar-aramid a drainage canal.
Inbatadna a dua kadagiti biktima ket pimmusay idinto a ti maysa ket naisalakan babaen ti panagresponde dagiti kameng ti Philippine Red Cross, Bureau of Fire Protection, City Disaster Risk Reduction and Management Office ken dadduma pay.
Inlawlawagna a pinadas pay dagiti otoridad nga isalbar ti biag dagiti dua a construction worker babaen ti panangiwayatda ti CPR wenno cardiopulmonary resuscitation ngem napaay dagitoy.
Kunana nga adda ti agarup pito a kadapan ti kauneg ti nakagaburan dagiti maseknan a biktima no sadinno a nalukneng ti daga a nangitunda ti panagreggaay daytoy.
Innayonna a nagpaot ti maysa nga oras sakbay a naan-anay a naiyaonda dagiti biktima.
Kabayatanna, naammoan a dagiti construction worker a pimmusay ket taga Manila ken taga Isabela.
