LAOAG CITY – Inlawlawag ni Sangguniang Panlungsod Member Jayson Perera ti saan a panangaprobar ti konseho iti ordinansa mainaig iti pannakaipawil ti panagdalyasat dagiti dump truck kadagiti barangay road ditoy siudad ti Laoag.
Segun ken ni Atty. Perera, apaman a naipadanon daytoy kadakuada ket immunan nga insaritada daytoy iti Department of the Interior and Local Government.
Inbatadna a ditoy a naammoanda nga awan ti karbengan dagiti barangay a mangipawil kadagiti dump truck a dumalyasat kadagiti barangay road.
Inlawlawagna a no kitaen amin a lugan a nakarehistro iti Land Transportation Office ket adda ti baybayadanda a road users tax.
Kunana a ti road users tax ket usaren a pangtarimaan ken panangmentenar kadagiti pampubliko a kalsada isu’t gapuna a saan a mabalin a mapawilan dagitoy.
Naammoan a naiget a maipawil dagiti dump truck nga agdagsen ti 7,500 kilos a dumalyasat kadagiti barangay road.
Immuna iti daytoy, naammoan nga adu dagiti barangay ditoy siudad ti Laoag ti nangipasa ti ordinansa mainaig daytoy a banag gapu ta mamati dagitoy a maysa a pakadadaelan dagiti barangay road.
