LAOAG CITY – Ad-adalen ti Department of Trade and Industry (DTI) ti posible a pannakikoordinarna iti Boeing tapno mapalawa ti industria ti aerospace, satellite technology ken digital infrastructure iti pagilian.
Nakitaripnong ni Trade Secretary Cristina Roque iti satellite unit ti Boeing iti California tapno matalantan ti potensial a pannakibinnulig.
Inbatad ni Roque, dakkel ti maitulong ti Boeing iti panagpadur-as ti aviation, defense ken satellite communications ti Pilipinas.
Iti agdama, adda ti sangapulo a kompania a Pilipino nga agar-aramid ti paset para kadagiti commercial aircraft ti Boeing a mangbukbukel ti $100 million iti global supply chain ti kompania.
Inburay ti Boeing ti cutting-edge satellite technologies-da ken plano daytoy a mangirubat ti satellite ita a 2025 tapno mapasayaat ti komunikasion iti Southeast Asia a pakabenepisiaran ti Pilipinas.
Ginutigot ni Roque ti Boeing a palawaen ti manufacturing ken technology investments-da iti pagilian nangruna iti babaen ti CREATE MORE Act a mangipaay ti tax incentives iti high-tech industries.
Naammoan a nabayagen nga adda ti koordinasion ti Boeing ken Pilipinas, sipod pay idi 1946 idi timmulong daytoy iti maysa nga airline company iti umuna a trans-Pacific flight ti maysa nga Asian airline.
