LAOAG CITY – Inadmitir ni Mayor Antonio Mariano iti ili ti Marcos a saanna nga inikkan ti abuno dagiti sumagmamano nga agmulmula ti tabako iti nasao nga ili.
Segun kenkuana, sapasap koma a maipaayan ti libre nga abuno dagiti agmulmula ti tabako iti ili ti Marcos ngem adda dagiti saanna nga inikkan gapu ta saan da a tungtungpalen iti tulagan.
Kinunana nga imbes a mairekord nga aggapo iti ili ti Marcos dagiti maapit a tabako ket saan gapu ta ilako da met kadagiti maaw-awagan a “cowboy”.
Gapu iti daytoy, kuna ti mayor nga imbes a mapan ti buwis iti ili da ket mapan iti sabali a lugar a dagitoy ti mabenepisyaran.
Mainaig iti daytoy, inbatad ti mayor a kinasaritana a nasayaat dagiti agmulmula ti tabako no apay a kastoy ti ar-aramiden da ket naamoan na nga adda ti utang dagiti maseknan a mannalon kadagiti paglaklakwan da.
Sungbat daytoy ti mayor kalpasan nga adda ti reklamo dagiti sumagmamano a mannalon mainaig iti saan a sapasap a pannakaited ti libre nga abuno iti ili ti Marcos.
