LAOAG CITY – Nakaawat aminen dagiti miembro iti Tricycle Operators and Drivers Association ti siudad ti Batac ti tulong ti Provincial Government of Ilocos Norte wenno PGIN babaen iti Manayon a Tulong Pasada ti Metro Ilocos Norte Council.
Daytoy ket kalpasan a naipaayen ti tulong a para kadagiti nabatbati a 1,659 a drivers ti traysikelan ti siudad ti Batac.
Segun iti gobierno probinsial, P4,900,077 a pisos ti pakabuklan ti naipaay a tulong para kadagiti maseknan no sadinno a nakaawat ti tallo ribo a pisos iti kada benepisyaryo.
Malaksid iti naipaay a “cash” kadagitoy a pangtulong kadakuada gapu iti agtultuloy a pannakaipangato ti presyo dagiti produkto a petrolio ket adda pay ti naipaay a T-shirt, bagas, reflectorized vest ken tents.
Mainaig iti daytoy, mangnamnama ti gobierno probinsial a makatulong dagitoy a mangalay-ay iti rigat a paspasaren dagiti traysikelan.
Maipalagip nga iti umuna a bansada ti pannakaipaay ti tulong ket nakurkurang ngem tallo a milyon a pisos ti tulong nga inpaay ti gobierno probinsyal kadagiti 987 a tricycle drivers ti nadakamat a siudad.
