LAOAG CITY – Inrakurak ni Ms. Mary Joan Pasugui, ti focal person ti Local Committee against Trafficking Violence against Women and their Children nga adda pay ti sumagmamano nga aktibidad nga iwayat ti gobierno lokal ditoy ciudad ti Laoag kadagiti maudi nga aldaw ti bulan ti marso kas paset ti selebrasyon ti women’s month.
Kunana a maysa kadagiti maiyuswat pay nga aktibidad ket ti panangipaay ti gundaway a makainana ken makarelax dagiti babbai ditoy ciudad.
Inpakaammo na a ti nasao nga aktibidad ket para kadagiti public servant ken volunteers kadagiti nagduduma a barangay ditoy ciudad ti Laoag.
Segun kenkuana, karaman kadagiti maipaay a serbisyo a mabalin a gundawayan dagiti maseknan ket ti facial, manicure ken pedicure, kasta met iti masahe.
Malaksid iti daytoy, inbatad na nga addan to pay ti livelihood program no sadinno a maiyuswat ti skills training a makatulong tapno mapapigsa dagiti kabaelan dagiti babbai a mabalin da nga usaren iti panagsarak ti nayon a pamastrekan.
Kabayatanna, maiwayat met ti Sunshine women ditoy ciudad intono Marso 28 kas paset paylaeng ti selebrasyon ti women’s month ita a bolan.
