LAOAG CITY – Kalikagum ti Presidential Anti-Organized Crime Commission (PAOCC) a kasaritana dagiti agpanpanday linteg para iti pannakaipasa ti linetg a nasken a mapagsungbat dagiti akinkukua ti pagtaengan wenno establishimento nga adda ti agop-operar nga iligal a Philippine Offshore Gaming Operator (POGO) facility.
Inbatad ni Presidential Anti-Organized Crime Commission Executive Director Gilbert Cruz a ti kinaadu ti raid nga inwayatda ket saan a mapagsungsungbat dagiti akinkukua ti pasdek no sadinno nga agop-operar ti Philippine Offshore Gaming Operator.
Naammoan a masansan a paglibakan dagiti Building Administrator a saanda nga ammo nga iligal a Philippine Offshore Gaming Operator ti agab-abang iti opisinada.
Maipalagip nga iti kaudian nga inwayatda nga operasion idiay Makati City nga adda ti 200 nga empleado ti inarestarda ken daytoy ket masarakan iti mismo sentro ti siudad.
