LAOAG CITY – Lappedan dagiti pamilia dagiti biktima ti extra judicial killings (EJK) a temporario a mawaya-wayaan ni dati a Presidente Rodrigo Duterte.
Inbatad ni Atty. Kristina Conti, International Criminal Court (ICC) Assistant to Counsel a bassit ti tsansana a mapatgan ti kiddaw ti abugado ni Duterte para iti interim release daytoy.
Iti baet daytoy, inadmitir met ni Conti a dakkel latta ti impluwensia ti dati a Presidente.
Inbatadna a napateg nga itultuloy ti proseso ti International Criminal Court nga awan ti pammutbuteng ken awan ti panangpatay kadagiti saksi tapno maikkan ti hustisyia dagiti biktima ti extrajudicial killings iti war on drugs.
Mamati ni Conti a bassit ti posibilidad a mapalubusan a temporario a mawaya-wayaan ti dati a Presidente gapu ta awan pay ti napalubusan iti babaen ti International Criminal Court.
