LAOAG CITY – Saan nga agsardeng ti Israel iti panangrautna iti Gaza agingga a saan a waya-wayaan ti Hamas dagiti hostage-da.
Daytoy ket iti baet nga adda ti panawagan dagiti European countries para iti ceasefire tapno adda ti maidanon nga aid supplies.
Segun ken ni Ophir Falk, Foreign Policy Adviser ni Prime Minister Benjamin Netanyahu, babaen iti daytoy a wagas ket mapilitan ti Hamas a paruk-atan dagiti 59 a nabatbati pay nga hostage-da.
Inbatadna nga adda ti 80 nga hostage nga immunan a winaya-wayaan ti Hamas idi Nobiembre 2023.
Inlawlawagna nga agingga a saan nga agtungpal ti Hamas iti kiddawda ket agtultuloy ti panangrautda ken pannakai-deploy ti ground troops iti Gaza.
Nagkedked ni Falk a mangipaay ti detalye maipanggep iti saritaanda iti pannakaipasardeng ti ceasefire.
Innayonna nga inakseptar ti Israel ti inlungalong ni United States Presidente Donald Trump babaen ken ni Steve Witkoff para iti pannakaiyalud-od ti ceasefire agingga inton malpas ti Ramadan ken ti Jewish Passover holiday inton sumaruno a bulan.
