LAOAG CITY – Inpakaammo ti City Health Office ditoy ciudad ti Laoag nga ado latta dagiti agturturong iti opisina da tapno agpatudok ti anti-rabies vaccine.
Daytoy ti inpakaammo ni Dr. Rodrigo Catcatan, ti City Health Officer ditoy ciudad ti Laoag.
Kuna na a dagiti kangrunaan a mapmapan agpabakuna ket dagiti nakagat ti taraken da nga aso ken pusa.
Innayon na a dagiti dadduma a napan iti opisina da ket nakagat ti rabbit ken bao ngem saan da a binakunaan kontra iti rabies.
Inlawlawag na a manmano nga adda ti kaso a makaala ti rabies ti tao manipod kadagiti nadakamat nga ayop.
Nupay kasta, inbatad na a ti inbakuna da kadagiti maseknan ket ti anti-tetano.
