LAOAG CITY – Agdagup ti 116 nga Automated Counting Machine ti mai-deliver ditoy siudad ti Laoag para iti 2025 National and Local Elections.
Segun ken ni Atty. Julius Balbas, Election Officer ditoy siudad ti Laoag, manamnama a sumangpet dagiti Automated Counting Machine inton Abril 19.
Inbatadna nga apaman a makasangpet dagitoy ket agtalinaedda pay laeng iti storage room iti lokal a gobierno ditoy siudad.
Mainag iti daytoy, kuna ni Atty. Balbas a maipaimanto metten dagiti Automated Counting Machine kadagiti voting centers ditoy siudad inton Mayo 5 agingga 7.
Innayonna nga adda ti agarup 82 a ribu a botante ti agbutos iti umay nga eleksion.
Kabayatanna, mangnamnama ni Atty. Balbas ti nakappia nga eleksion ita a tawen iti baet nga adda ti panagbinnara ti sumagmamano a kandidato ditoy siudad ti Laoag.
