LAOAG CITY – Paimbestigaran ti Sangguniang Panlungsod dagiti maipagarup nga agkolkolektar ti garbage fee kadagiti aglaklako iti Aurora Park ditoy siudad ti Laoag.
Daytoy ket kalpasan nga adda ti naipadanon iti konseho nga adda ti agkolkolektar ti 50 a pisos kas garbage fee kadagiti agpuespuesto iti nasao a lugar.
Segun ken ni Sangguniang Panlungsod Member Jason Perera a kasapulan a makita dagitoy gapu ta awan ti aniaman a bayadan dagiti aglaklako a kastoy a banag iti panagpuestoda iti Aurora Park nangruna no ti maysa nga area ket kukua ti maysa a local government unit.
Inbatadna a kalikagumda a mapagbalin ti Aurora park a pakasarakan kadagiti agkakaimas a taraon a mabalin a daywen dagiti umili kangrunaanna kadagiti turista nga agturturong iti nasao a siudad.
Kunana a masapul a makita pay kadagiti aglaklako ti kinadalus dagiti taraon nga ilakoda para iti kinatalged ti tunggal umili.
Innayonna a rumbeng a saan a kastoy ti mapaspasamak kadagiti aglaklako iti Aurora Park rason a kasapulan iti panangkita dagitoy a nasayaat tapno awan ti agbalin a problema kadagitoy.
